ගම්පොල සිංහාපිටිය ප්‍රදේශයේ පදිංචි එක්‌ දරුමවකට රංචු ගැසී සමුහ දුෂණයකට හා බරපතළ ලිංගික අපයෝජනයකට ලක්‌ කළ දස දෙනකු ලබන මාර්තු මස 3 දින දක්‌වා රක්‌ෂිත බන්ධනාගාර ගත කරන ලෙස ගම්පොල මහෙස්‌ත්‍රාත් හා දිසා විනිසුරු චාන්දනී මීගොඩ මහත්මිය නියෝග කළාය.

මෙසේ රක්‌ෂිත බන්ධනාගාර ගත වූවන් දස දෙනාම සිංහාපිටිය ප්‍රදේශයේ පදිංචිකරුවන් වන අතර ඔවුන් ගෙන් 9 දෙනකුම විවාහකයෝ වෙති.

මොවුන් අතර යුද හමුදා සෙබළෙක්‌ ගම්පොල නගරයේ හා සිංහපිටිය ප්‍රදේශයේ ත්‍රිවිල් හයර් කරන 7 දෙනෙකු හා මේසන් බාස්‌ලා දෙදෙනකු ද සිටින බව පොලිස්‌ පරීක්‌ෂණ වලින් අනාවරණය වී තිබේ.

31 හැවිරිදි මෙම මවට මාස 7 ක අත දරුවකු සිටින අතර ඇගේ සැමියා යුද හමුදා සේවයේ සිටියදී බිම් බෝම්බයක්‌ පුපුරා පාදයක්‌ ඉවත් කොට තිබේ.

මොහු නිවසේ නොසිටි අවස්‌ථා 3 කදී මෙම සැකකරුවන් එක්‌ව ඇය හා දරුවා මරණ බවට තර්ජනය කොට ඇය දූෂණය කළ බව විමර්ශන වලින් හෙළිවී තිබේ.

නිවස පිටුපස ජල නළයෙන් මෙම කාන්තාව දිය නෑමට සූදානම් වූ අවස්‌ථාවේ මෙම සැකකරුවන් පැමිණ ඇය දූෂණය කළ අවස්‌ථාවේ නිවසේ සිටි අත දරුවා කිරි ඉල්ලා හඬා වැටී ඇති බවත් මොවුන්ගේ ග්‍රහණයට නතු වී සිටි කාන්තාව ඒ බව පවසා දරුවාට කිරි දීමට යන ලෙස ඉල්ලුවද සැකකරුවන් තමාට බරපතළ ලෙස ලිංගික අපයෝජනය කොට දූෂණය කළ බව පැමිණිල්ලේ සඳහන් කොට ඇත.

පසුව ඇය සිහිසුන්ව බොහෝ වේලා එම ස්‌ථානයේ සිට නිවස තුළට පැමිණි බවත් ඉන්පසු කිසි දෙයක්‌ සිදු කර ගැනීමට නොහැකිව නිවසේ සිටියදි සැමියා පැමිණ ඇති බවත් සැමියා මේ පිළිබඳව විමසුවද තම දරුවා හා සැමියා මරණ බවට මොවුන් තර්ජනය කළ නිසා මේ සම්බන්ධව කිසිවක්‌ නොපවසා සිටින විට සැමියා තමාට පහරදී විමසීමේදී සිදු වූ සියල්ල පැවසූ බවද පැමිණිල්ලේ සඳහන් වේ.

මෙම සැකකරුවන් දස දෙනා අතර අවුරුදු 24 වයසේ දෙදෙනකු ද 25 වයසේ දෙදෙනකුද 28 වයසේ දෙදෙනකුද 36 වයසේ දෙදෙනකුද සිටින අතර අනෙක්‌ සැකකරුවන් අවුරුදු 26 හා 37 ක පසු වූවන්ය.

මෙම සැකකරුවන් සියලු දෙනා වෛද්‍ය පරීක්‍ෂණ සඳහා ගම්පොල රෝහල වෙත ඇතුළත් කළ අතර අතවරයට ලක්‌වූ කාන්තාව ගම්පොල රෝහලින් පේරාදෙණිය රෝහල වෙත යවා ඇත.

සුරංග දිල්හාන්

Comments

comments

NO COMMENTS

LEAVE A REPLY